Qateel Shifai
miri nazar se na ho duur ek pal ke liye
tira vajud hai lazim miri ghazal ke liye
kahan se DhunDh ke la.un charagh sa vo badan
taras ga.i hain nigahen kanval kanval ke liye
kisi kisi ke nasibon men ishq likkha hai
har ik dimagh bhala kab hai is ḳhalal ke liye
hui na jur.at-e-guftar to sabab ye tha
mile na lafz tire husn-e-be-badal ke liye
sada jiye ye mira shahr-e-be-misal jahan
hazar jhonpaḌe girte hain ik mahal ke liye
‘qatil’ zaḳhm sahun aur muskurata rahun
bane hain da.ere kya kya mire amal ke liye
Leave a Reply