aap hi fan ka parastar samajhte hain mujhe
varna ye log to fankar samajhte hain mujhe
uljhanen le ke chale aate hain basti ke makin
kitne nadan hain samajhdar samajhte hain mujhe
sar paTakte hain mire siine pe sab rote hue
rone vaale koi divar samajhte hain mujhe
mere chup rahne pe patthar mujhe kahne vaale
mere rone pe adakar samajhte hain mujhe
dhuup niklegi to un sab ke bharam TuTenge
ye jo sab saya-e-divar samajhte hain mujhe
haan main bimar huun par gham mujhe is baat ka hai
ghar ke sab log bhi bimar samajhte hain mujhe
mujh ko is sim-zada shahr men rahna hai jahan
sab mohabbat ka gunahgar samajhte hain mujhe
Leave a Reply