lutf duniya to faqat dida-e-namnak men hai
shaiḳh sahab ki nazar aaj bhi aflak men hai
jis ne ta.amir kiya mujh ko lahu hathon se
ḳhaak ho ja.un ki vo shaḳhs bhi ab ḳhaak men hai
mujh ko majbur kiya hai miri majburi ne
aaj bhi meri ana kaghzi poshak men hai
main jo bimar hua us ne ayadat ki hai
ḳhu-e-rahmat bhi usi qatil-e-saffak men hai
ai dil-e-hijr-zada mujh ko na rusva karna
sharm thoḌi si abhi lahja-e-bebak men hai
meri rusva.i men shamil nahin mere chehre
hakim-e-shahr magar aaj bhi is taak men hai
shahr-e-be-mehr men zinda tha faqat main ‘sahil’
mere ehsas ka qatil miri poshak men hai
Leave a Reply