Poet
khuban ke biich janan mumtaz hai sarapa
andaz-e-dilbari men ejaaz hai sarapa
pal pal matak ke dekhe dag dag chale latak ke
vo shokh chhal chhabila tannaz hai sarapa
tirchhi nigah karna katra ke baat sunna
majlis men ashiqon ki andaz hai sarapa
nainon men us ki jaadu zulfan men us ki phanda
dil ke shikar men vo shahbaz hai sarapa
ghamza nigah taghaful ankhiyan siyah o chanchal
ya rab nazar na laage andaz hai sarapa
us ke khiram uupar taus mast haiga
vo miir dil-rababi tannaz hai sarapa
kisht-e-ummid karta sarsabz sabza-e-khat
anjam-e-husn us ka aghaz hai sarapa
vaqt-e-nazara ‘faez’ dildar ka yahi hai
bistar nahin badan par tan-baz hai sarapa
Leave a Reply