Nazar Hairat-Zada Si Hai Qadam Bahke Hue Se Hain

Poet

nazar hairat-zada si hai qadam bahke hue se hain

shabab aaya hai un par aur ham bahke hue se hain

abhi un ke karam ki baat apne husn-e-zan tak hai

magar ummid-varan-e-karam bahke hue se hain

vafa ke silsile men ho hi jaati hai ghalat-fahmi

vo bahka.e ga.e se hain na ham bahke hue se hain

baḌe zi-hosh bante the mai-e-ishrat ke matvale

hua hai jab se kuchh ehsas-e-gham bahke hue se hain

unhen a.ina-ruḳh kahiye unhin ke samne ja kar

ye andaza to hota hai ki ham bahke hue se hain

kaha karte the ham akasr ki rah-e-zindagi hai kya

jo ab dekhe hain us ke pech-o-ḳham bahke hue se hain

miri duniya hai ye ahl-e-junun kya hosh vaale kya

miri duniya men sab hi besh-o-kam bahke hue se hain

ḳhuda rakkhe chale hain manzil-e-janan ko sar karne

vo dekho na yahin jin ke qadam bahke hue se hain

har ik ne mujh ko divana hi Thahraya hai ai ‘mahshar’

sabhi qissa-nigaron ke qalam bahke hue se hain