Bastiyan Lutti Hain Khwabon Ke Nagar Jalte Hain

bastiyan lutti hain khvabon ke nagar jalte hain

ham vahan hain ki jahan sham-o-sahar jalte hain

dil ke aivan men afsurda charaghon ka dhuan

duur kuchh duur vo yadon ke khanDar jalte hain

phir kisi manzil-e-jan-soz ki janib hain ravan

chob-e-sahra ki tarah ahl-e-safar jalte hain

yuun to pur-amn hai ab shahr-e-sitamgar lekin

kuchh makan khud hi sar-e-rahguzar jalte hain

hai ba-zahir koi shoala na chamak aur sharar

ham kisi gham men ba-andaz-e-digar jalte hain

atish-e-talkhi-e-halat men kya kuchh na jala

ab gila kya hai jo ehsas ke par jalte hain

go ho barfab bhi taskin hai dushvar ‘sahar’

apni hi aag men arbab-e-hunar jalte hain

Leave a Comment