sab badalte ja rahe hain sar-ba-sar apni jagah
dasht ab apni jagah baaqi na ghar apni jagah
main bhi nadim huun ki sab ke saath chal sakta nahin
aur sharminda hain mere ham-safar apni jagah
kyuun simaTti ja rahi hain ḳhud-ba-ḳhud abadiyan
chhoḌte kyuun ja rahe hain bam-o-dar apni jagah
jo kuchh in ankhon ne dekha hai main us ka kya karun
shahr men phaili hui jhuTi ḳhabar apni jagah
main ‘jamal’ apni jagah se is liye haTta nahin
vo ghaḌi aa jaa.e shayad lauT kar apni jagah
Leave a Reply