Sahiba Sheheryar
niind in ankhon men ban kar aa.e koi
lori maan ki mujhe suna jaa.e koi
duur yahan se ja kar sab kuchh bhuul ga.e
ham zinda hain un ko batla.e koi
roz-e-azal se ham the akele duniya men
kahan se aur kaise ab saath aa.e koi
sach ko main sach maan luun ab ye behtar hai
mujh ko qaa.il kaise kar paa.e koi
aisi kahani kabhi nahin jo guzri ho
vahi kahani mujhe suna jaa.e koi
dard ko sahna bhi aadat men shamil hai
dard ki kitni had hai samjha.e koi
ab kuchh hi lamhon ka safar ye baaqi hai
‘sahiba’ bojh kahan tak sah paa.e koi
Leave a Reply