ab tak the vabasta jo alfaz ke tanon-banon se
apni qimat maang rahe hain be-qadre insanon se
maujon ke qirtas pe dekho dast-e-qudrat ka aalam
ek maqala likhta hai vo kitne hi unvanon se
jab se hai siine ke andar har-su taari sannaTa
vahshat hai na ḳhauf raha hai is dil ko viranon se
kitne hi ḳhurshid agarche ummidon ke Duub chuke
ek diya rakkha hai raushan laḌne ko tufanon se
us ki yadon se tum ab tak munh ko pher ke baiThe ho
aise kab ruTha karte hain ghar aa.e mehmanon se
us ne bhi halqe men apne farzanon ko DhunD liya
ham ne bhi kar li hai sangat sahra men divanon se
ham to patthar ki basti men shishon ke rakhvale hain
zaḳhmon ki ta.adad na puchho ham jaise na-danon se
miTTi men dafna kar aise jhaaḌ rahe hain haath sabhi
bojh utara hai rishton ka jaise apne shanon se
rindon se ab maiḳhane ka puchho na ahval ‘shakil’
rishta jab tum toḌ chuke ho saaqi se paimanon se
Leave a Reply