bhuul baitha tha magar yaad bhi khud main ne kiya
vo mohabbat jise barbad bhi khud main ne kiya
noch kar phenk diye aap hi khvab ankhon se
is dabi shaad ko nashad bhi khud main ne kiya
jaal phailae the jis ke liye charon janib
us giraftar ko azad bhi khud main ne kiya
kaam tera tha magar maare muravvat ke use
tujh se pahle bhi tire baad bhi khud main ne kiya
shahr men kyuun miri pahchan hi baaqi na rahi
is kharabe ko to abad bhi khud main ne kiya
har naya zaiqa chhoda hai jo auron ke liye
pahle apne liye ijad bhi khud main ne kiya
inkisari men mira hukm bhi jaari tha ‘zafar’
arz karte hue irshad bhi khud main ne kiya