Poet
yaad hai ik ek lamhe ka khichao dekhna
raat ke qulzum men sadiyon ka bahao dekhna
vaqt se pahle na phaT jaa.e ghubara zehn ka
phailne vaale ḳhayalon ka dabao dekhna
vo to kho baiTha hai pahle hi se apni raushni
is diye ko duur hi se ai havao dekhna
kuchh to hon mahsus tum ko zindagi ki uljhanen
shahriyon ḳhana-ba-doshon ke paḌav dekhna
varna do TukḌon men baT ja.egi us ki zindagi
hai zarurat kitna dhage ko khichao dekhna
phir hava se ruuTh kar khola hai tu ne badban
phir ghalat ruḳh par na bah jaa.e ye naav dekhna
Leave a Reply