baharen rang laati hain chaman abad hota hai
ki jab nazuk labon se husn ka irshad hota hai
hasinon ki adaon ke asar-andaz hote hi
kabhi dil shaad hota hai kabhi nashad hota hai
ijazat jab nahin milti use naghma-sara.i ki
to bulbul ki ḳhamoshi se chaman barbad hota hai
vo apni jaan ki baazi laga.e to laga.e kyon
ki naḳhra husn ka jis ke liye jallad hota hai
nigahon se paḌhi jaati hai tahrir-e-ruḳh-e-raushan
nigahon se ada-bini ka fan ijad hota hai
ada-e-husn bhi ik chashma-e-tahrik hai sahab
use apna le jo bhi bas vahi shah-zad hota hai
usi ko karna hoti hai alam ki tarjumani bhi
mire honTon pe jo bhi jumla-e-fariyad hota hai
kisi ko bhi yaqin hota nahin hai apni ankhon par
qafas men jab parinde ki jagah sayyad hota hai
usi par naaz karti hai hamesha haath ki rekha
ki jis ki muTThi men bhi virsa-e-ajdad hota hai
hamesha sar jhukata hai ‘jigar’ sahab ki dharti par
ki jaana jab bhi panchhi ka muradabad hota hai
Leave a Reply