Ahmad Ameer Pasha
tumhari tishna-nigahi ka ehtiram karen
furat-e-dasht-e-tamanna tumhare naam karen
ye hijr un ko mila hai unhi ki khvahish par
ab ahl-e-dard ye jiine ka ehtimam karen
tumhari bazm men kuchh bhi samajh nahin aata
kise ishara karen aur kise salam karen
bahut zaruri hai ye dhuup talne ke liye
shajar laga ke tire falsafe ko aam karen
mukhalifat bhi maza deti hai agar ham log
mukhalifat ke usulon ka ehtiram karen
tumhare vasl ki khushiyon men dil ye karta hai
tumhare naam par azad ik ghulam karen
yahi to pahla sabaq hai zamana-gardi ka
baghal men le ke chhuri munh men raam raam karen
hisar-e-jan se bahut unchi ho gai hai ‘amir’
fasil-e-jabr girane ka intizam karen
Leave a Reply