Anjum Barabankvi
zanjir to pairon se thakan bandhe hue hai
divana magar sar se kafan bandhe hue hai
ḳhushbu ke bikharne men zara der lagegi
mausam abhi phulon ke badan bandhe hue hai
dastar men ta.us ke par bandhne vaala
gardan men masa.il ki rasan bandhe hue hai
shayad kisi majzub-e-mohabbat ko ḳhabar ho
kis sehr se dharti ko gagan bandhe hue hai
me.araj-e-aqidat hai ki ta.aviz ki surat
baazu pe koi ḳhak-e-vatan bandhe hue hai
suraj ne andheron ki nazar bandh ke puchha
ab kaun ujalon ka suḳhan bandhe hue hai
Leave a Reply