Rajinder Manchanda Bani
qadam zamin pe na the raah ham badalte kya
hava bandhi thi yahan piiTh par sambhalte kya
phir us ke hathon hamen apna qatl bhi tha qubul
ki aa chuke the qarib itne bach nikalte kya
yahi samajh ke vahan se main ho liya ruḳhsat
vo chalte saath magar duur tak to chalte kya
tamam shahr tha ik mom ka aja.ib-ghar
chaḌha jo din to ye manzar na phir pighalte kya
vo asman the ki ankhen sameTtin kaise
vo ḳhvab the ki miri zindagi men Dhalte kya
nibahane ki use bhi thi aarzu to bahut
hava hi tez thi itni charagh jalte kya
uThe aur uTh ke use ja sunaya dukh apna
ki saari raat paḌe karvaTen badalte kya
na abru-e-ta.alluq hi jab rahi ‘bani’
baghair baat kiye ham vahan se Talte kya
Leave a Reply