Hafeez Jaunpuri
sadme jo kuchh hon dil pe sahiye
puchhe bhi koi to chup hi rahiye
be-sabr hi kah ke ruk ga.e kyuun
kahiye kahiye kuchh aur kahiye
aḳhir kab tak ye be-niyazi
insaf se aap hi na kahiye
mar hi jaane ki baat hai ye
mere liye aap zulm sahiye
ankhon men ghurur hai kisi ka
kis tarah kisi se dab ke rahiye
sunne ki jo baat ho vo suniye
kahne ki jo baat ho vo kahiye
rone ko paḌi hai umr saari
chhalon ki tarah na phuuT bahiye
suniye jo ‘hafiz’ ki musibat
ro dijiye aap men na rahiye
Leave a Reply