ham ne us shoḳh ki ra.ana.i qamat dekhi
chalti phirti hui tasvir-e-qayamat dekhi
mohtasib jam-o-subu ghar men hamare nikle
ham ne ye hazrat-e-zahid ki karamat dekhi
main chala dil ka janaza jo baghal men le kar
bole main ne yahi chalti hui turbat dekhi
ham ga.e su-e-adam tu na vahan se aaya
nama-bar raah tiri ta-dam-e-rehlat dekhi
hai ye ta.abir ki qad par tire ashiq honge
ḳhvab men hazrat-e-zahid ne qayamat dekhi
aa ga.i yaad mujhe va.iz-o-naseh ki ‘vasim’
zer-e-turbat jo nakirain ki surat dekhi
Leave a Reply