Charagh-E-Dil Jalane Mein Bahut Hi Der Kar Di Hai

Shahnaz Muzammil

charagh-e-dil jalane men bahut hi der kar di hai

suragh-e-dard paane men bahut hi der kar di hai

harir-o-parniyan ḳhushbu jaḌav haath ke kangan

gul-o-lala sajane men bahut hi der kar di hai

kahin patthar na ho jaa.en miri ye muntazir ankhen

palaT kar tum ne aane men bahut hi der kar di hai

chalo kuchh muḳhtasar kar den gham-o-alam ka qissa

tumhen ham ne bhulane men bahut hi der kar di hai

junun be-bak ne saari hadon ko toḌ Daala hai

ḳhirad ne maat khane men bahut hi der kar di hai

numu ki rut bahut muddat se tariki men Thahri hai

na.e suraj ne aane men bahut hi der kar di hai