Har Lamha Zulmaton Ki Khudai Ka Waqt Hai

har lamha zulmaton ki khudai ka vaqt hai

shayad kisi ki chehra-numai ka vaqt hai

kahti hai sahilon se ye jaate samay ki dhuup

hushyar naddiyon ki chadhai ka vaqt hai

hoti hai shaam aankh se aansu ravan hue

ye vaqt qaidiyon ki rihai ka vaqt hai

koi bhi vaqt ho kabhi hota nahin juda

kitna aziiz us ki judai ka vaqt hai

dil ne kaha ki sham-e-shab-e-vasl se na bhaag

ab pak chuki hai fasl katai ka vaqt hai

main ne kaha ki dekh ye main ye hava ye raat

us ne kaha ki meri padhai ka vaqt hai

Leave a Comment