barson jo nazar tufanon ke aghosh men palti rahti hai
us mast nazar ki har jumbish afsane ugalti rahti hai
jo tark-e-talab se pahle tha dil ka vahi aalam aaj bhi hai
a.ina nahin badla jaata tasvir badalti rahti hai
ji bhar ke use dekha lekin ab tak ye nazar bharti hi nahin
ma.asum ada men rah rah kar ik baat nikalti rahti hai
tu mere junun se nalan hai is par to nazar kar ai naseh
vo zulf ḳhud apne halqon ke andaz badalti rahti hai
mai-ḳhana ‘faridi’ kya jaane kis ko na mili kis ne pi li
saghar hain ki chalte rahte hain sahba hai ki Dhalti rahti hai
Leave a Reply