zindagi ka kis liye matam rahe
mulk basta hai miTe ya ham rahe
dil rahe piiri men bhi tera javan
aḳhiri dam tak yahi dam-ḳham rahe
chahiye insan ka dil ho ghani
paas maal o zar bahut ya kam rahe
kya isi jannat ki ye tahris hai
jis men kuchh din hazrat-e-adam rahe
vasl se matlab na rakh tu ishq ka
dam bhare ja dam men jab tak dam rahe
laag ik din ban ke rahti hai lagav
haan lagavaT kuchh na kuchh baham rahe
ishq ne jis dil pe qabza kar liya
phir kahan us men nashat o gham rahe
sharq se jab nuur chamka to kahan
barg-e-gul par qatra-e-shabnam rahe
husn ki duniya ka hai daa.em shabab
hashr tak us ka yahi aalam rahe
hai surur-e-husn ‘kaifi’ la-yazal
dar-ḳhur-e-zarf us men besh o kam rahe
Leave a Reply