hamari umron se ra.igani ko kha ga.i hai
faza mohabbat ki bad-gumani ko kha ga.i hai
bichhaḌne vaale palaT ke aaya to kin dinon men
ki jab juda.i miri javani ko kha ga.i hai
ye roz-o-shab apne ziist se ḳhali kaT rahe hain
ma.ash ki fikr zindagani ko kha ga.i hai
vo chahta tha ki us ke aage main giḌgiḌa.un
miri ana us ki ḳhush-gumani ko kha ga.i hai
ḳhabar nahin ho rahi hamen kuchh bhi is dhuen men
bujhi hui hai ya aag paani ko kha ga.i hai
hua nahin aaj fart-e-gham men bhi kar-girya
ye zabt ki ḳhu ‘hasan’ ravani ko kha ga.i hai
Leave a Reply