Log Tanhai Ka Kis Darja Gila Karte Hain

log tanhai ka kis darja gila karte hain

aur fankar to tanha hi raha karte hain

vo tabassum hai ki ‘ghalib’ ki tarah-dar ghazal

der tak us ki balaghat ko padha karte hain

koi jaadu koi jalva koi masti koi mauj

ham inhin chand saharon pe jiya karte hain

din pe yaron ko andhere ka guman hota hai

ham andhere men kiran DhunDh liya karte hain

bastiyan kuchh huiin viran to matam kaisa

kuchh kharabe bhi to abad hua karte hain

sunne valon ki hai taufiq sunen ya na sunen

baat kahne ki jo hai ham to kaha karte hain

sahil o bahr ke aaiin salamat na rahe

ab to sahil se bhi tufan utha karte hain

log baton men baha dete hain is daur ka dard

aur ashar men ham Dhaal liya karte hain

Leave a Comment