na dahr men na haram men jabin jhuki hogi
tumhare dar pe ada meri bandagi hogi
nigah-e-yar miri samt phir uThi hogi
sambhal sakunga na main aisi ye be-ḳhudi hogi
nigah pher ke ja to raha hai tu lekin
tire baghair basar kaise zindagi hogi
kisi tarah bhi piyen ham gharaz hai piine se
nahin hai jaam to ankhon se mai-kashi hogi
tamam hosh ki duniya nisar hai us par
tiri gali men jise niind aa ga.i hogi
guzar hi ja.ega duniya se be-talab ho kar
tire ḳhayal se jis dil ko dosti hogi
jamal-e-yar pe yuun jaan nisar karta huun
fana ke ba.ad ‘fana’ ghar men raushni hogi
Leave a Reply