Mukashafa-2

Ahmad Hamesh

ye kis ki nida mavara-e-nida aa rahi hai

ye roe maashiyat hai ya ghaib ka koi nurani haala

maut ki aamad aamad hai

maut maktab-e-ilm-e-adam se nikal ke

jism khak-o-khashak se jaan nikalti hai

phir apni bartari surkh-ravi liye

zamin-ta-zamin aur asman-ta-asman phirti hai

maut ek kartab-baz hai

ya tamam kartabon ki mojid hai

us ne nar aur maada ko ijad kiya

aur donon ko ham-badan kiya

phir inzal ki mausiqi men mausiqi men us ka gum hona hi to azal-o-abad hai

kabhi na zahir hone vaali zamin ki faza aur us ka asman to

parinde ke batin men hota hai

varna jism se jaan nikalte hue kis ne dekha hai

kis ne dekha hai ek dusre men sote-jagte ped-paudon ko

hashrat ko jamadat ko

niind to kisi gum-shuda jazire ka naam hai

aur bedari to ankhon ko dhoka dene vaali dhund hai

aur is dhund men an-ginat sadiyan biit gai

phir na jazira hi mila na sadiyan mustaqbil huiin