ai dida-e-giryan kya kahiye is pyar-bhare afsane ko
ik shama jali bujhne ke liye ik phuul khila murjhane ko
main apne pyaar ka diip liye afaq men har-su ghuum gaya
tum duur kahin ja pahunche the akash pe ji bahlane ko
vo phuul se lamhe bhari hain ab yaad ke nazuk shanon par
jo pyaar se tum ne saunpe the aghaz men ik divane ko
ik saath fana ho jaane se ik jashn to barpa hota hai
yuun tanha jalna thiik nahin samjhae koi parvane ko
main raat ka bhed to kholunga jab niind na mujh ko aaegi
kyuun chand sitare aate hain har raat mujhe samjhane ko
Leave a Reply