kya ho gaya kaisi rut palTi mira chain gaya miri niind ga.i
khulti hi nahin ab dil ki kali mira chain gaya miri niind ga.i
main laakh rahun yunhi ḳhak-basar shadab rahen tire sham-o-sahar
nahin us ka mujhe shikva bhi koi mira chain gaya miri niind ga.i
main kab se huun aas laga.e hue ik sham-e-umid jala.e hue
koi lamha sakun ka mile to sahi mira chain gaya miri niind ga.i
‘javed’ kabhi main shadan tha mire saath tarab ka tufan tha
phir zindagi mujh se ruuTh ga.i mira chain gaya miri niind ga.i
Leave a Reply