yahan kaun is ke siva rah gaya
zamana gaya aa.ina rah gaya
vo husn-e-sarapa vo husn-afrin
magar har koi dekhta rah gaya
chalo kya hua raushni hi to thi
yahan dekhne ko bhi kya rah gaya
hamari kuchh apni rivayat bhi thi
kitabon men likkha hua rah gaya
ḳhuda.i ko bhi ham na ḳhush rakh sake
ḳhuda bhi ḳhafa ka ḳhafa rah gaya
muqaddar kahin kaj-kulahi kare
koi ghar men mahv-e-dua rah gaya
kahin ek chup bhi rasa ho ga.i
koi bolta bolta rah gaya
Leave a Reply