be-samjhe-bujhe mohabbat ki ik kafir ne iman liya
ab aaTh aaTh aansu rote hain kyuun dil ka kahna maan liya
ham fikr men the chhup kar dekhen un jalvon ne pahchan liya
jab tak ye nazar uTThe uTThe zalim ne parda taan liya
kyuun husn-e-garan-maya ye kya tere jalve itne arzan
ek ek ḳhuda apna apna jis ne jise chaha maan liya
jis par sadqe donon aalam us ashk ki qimat kya kahiye
palkon par apni tol chuke daman men kisi ke chhan liya
ye koh-e-giran hilte hain kahin aur phir mazbut iradon ke
patthar ki lakir hai ai naseh jo ham ne dil men Thaan liya
jalva ki fareb-e-jalva tha jo ho tasvir mukammal thi
ik shor uTha har janib se pahchan liya pahchan liya
mujh se to kisi se bair na tha duniya mire ḳhuun ki pyasi hai
maqtal ki taraf se jo guzra ik haath lahu men saan liya
honTon pe banavaT ki vo hansi fariyad ka aalam sanson men
zalim ki mohabbat chhup na saki jis ne dekha pahchan liya
barson uljhe arbab-e-ḳhirad ye ek girah ab tak na khuli
sar aap hi jhuk ga.e sajde men ghabra ke ḳhuda ko maan liya
marna ho ‘siraj’ ki jiina ho be-minnat-e-ghair ho jo kuchh ho
kya rah ga.i ḳhanjar-e-qatil ka gardan pe agar ehsan liya
Leave a Reply