umr bhar bahte hain gham ke tund-rau dharon ke saath
jaane kyuun hote hain itne zulm fankaron ke saath
abr ki surat baraste hain buland-o-past par
ham nahin aansu bahate lag ke divaron ke saath
zehn ke parde pe raqsinda hain pyasi suraten
ham nashe men kaise bah sakte hain mai-ḳhvaron ke saath
roz ḳhun-e-arzu hota hai phir bhi pyaar hai
ham ko ai hasti tire dilchasp bazaron ke saath
ham-safar hai ḳhak-o-bad-o-atish-o-ab ai ‘hazin’
kaash nibh jaa.e hamari ab inhi charon ke saath
Leave a Reply