Ghulam Rabbani Taban
shauq ka taqaza hai sharh-e-arzu kiije
dil se ahd-e-ḳhamoshi kaise guftugu kiije
dil ho ya gareban ho roz chaak hote hain
kya junun ke mausam men koshish-e-rafu kiije
ashiqi-o-ḳhuddari bandagi-o-ḳhud-bini
aarzu ki rahon men ḳhun-e-arzu kiije
daad sa.i-e-paiham ki kuchh to dijiye ya.ani
taza-tar shikaston se dil ko surḳh-ru kiije
pa-e-shauq men kab tak raston ki zanjiren
surat-e-saba chaliye sair char-su kiije
hai ḳhulus ka maslak dushman-e-asar aḳhir
jo na ho muqaddar men us ki justuju kiije
bazm-e-jam-o-mina men dad-e-tishnagi diije
mausam-e-baharan men hasrat-e-numu kiije
kya ajab ki bar aa.e dil ki aarzu ‘taban’
sair ku-e-qatil ki aap bhi kabhu kiije
Leave a Reply