Jitendra Mohan Sinha Rahbar
aaj mahfil men na.e sar se sanvar a.enge
un ko ma.alum hai kuchh ahl-e-nazar a.enge
ru-ba-ru yaar ke gar bar-e-digar ja.enge
kar ke ham ek baḌa ma.arka sar a.enge
ye to dhamki hai ki vo ghair ke ghar ja.enge
ham-nashin dekhna hir-phir ke idhar a.enge
sabr karne ko jo kahte hain nahin aate hain
kya mire zaḳhm-e-jigar aap hi bhar a.enge
kaun umiid miri aap se puuri hogi
kaun arman mere aap se bar a.enge
laakh pardon men rahen mujh se nihan roz-ba-roz
ḳhvab men vo mujhe har shab ko nazar a.enge
dar se phir us but-e-pur-fan ke hamare naale
saaf zahir hai ki mayus-e-asar a.enge
chashm-e-bina se jo dekhenge mira parda-e-dil
ai masiha ka.i nasur nazar a.enge
koi kah do ki bas ab aur tavaqquf na karen
varna ham ji se guzarne pe utar a.enge
na-tavani se hamari tujhe kya tera sambhal
ham tire samne phir sina-sipar a.enge
azma.enge gham-e-hijr ka ik aur ilaaj
kar ke sahra men kuchh ayyam basar a.enge
rahbari ḳhaak rah-e-ishq men in se hogi
dil agar hazrat-e-‘rahbar’ kahin dhar a.enge
Leave a Reply