Ishq Kab Apne Maqasid Ka Nigahban Na Hua

Ehsan Danish

ishq kab apne maqasid ka nigahban na hua

kaun sa gham hai jo aḳhir gham-e-janan na hua

laakh chaha magar afsos ki aansu na thame

zabt-e-gham mujh se ba-qadr-e-gham pinhan na hua

teri ishrat hai ki gardun ke daba.e na dabi

mera gham hai ki hansi men bhi numayan na hua

gham-e-duniya gham-e-uqba gham-e-hasti gham-e-maut

koi gham bhi to harif-e-gham-e-janan na hua

zarre zarre se ye elan-e-pareshani hai

mutma.in ḳhaak vo hoga jo pareshan na hua

jis ke daman se hai vabasta mira zauq-e-hayat

vo bhi kafir mire me.aar ka insan na hua

main raha garche har ehsas pe masruf-e-sujud

koi sajda bhi tiri shaan ke shayan na hua

barf-zar-zor-o-daulat ka har afsurda zamir

zamzamon se mire kab sho.ala-ba-daman na hua

barq nakam mah-o-mehr kavakib mayus

na hua mere nasheman men charaghan na hua

mere taḳhliq-e-adab men hai qasida madum

mujh se ‘ehsan’ kisi vaqt ye isyan na hua