Khwaja Ali Husain
kabhi zamin na kahin asman se niklega
hamara raaz kisi raz-dan se niklega
vo ek ashk miri aqibat sanvarega
shab-e-firaq jo chashm-e-ayan se niklega
mujhe ḳhabar hai miri maut ka sabab mire dost
bas ek tiir tumhari kaman se niklega
main na-rasa.i se imkan khoj leta huun
mira yaqin bhi mere guman se niklega
jo bevafa.i se ta.abir kar raha hai mujhe
vo kam-shanas miri dastan se niklega
use nikala gaya tha bahisht se pahle
ab us ke baad ye aadam jahan se niklega
ab aur zabt karega to ‘abdi’ tera
shakeb aankh ke sail-e-ravan se niklega
Leave a Reply