Kabhi Zamin Na Kahin Aasman Se Niklega

kabhī zamīñ na kahīñ āsmāñ se niklegā

hamārā raaz kisī rāz-dāñ se niklegā

vo ek ashk mirī āqibat sañvāregā

shab-e-firāq jo chashm-e-ayāñ se niklegā

mujhe ḳhabar hai mirī maut kā sabab mire dost

bas ek tiir tumhārī kamāñ se niklegā

maiñ nā-rasā.ī se imkān khoj letā huuñ

mirā yaqīn bhī mere gumāñ se niklegā

jo bevafā.ī se ta.abīr kar rahā hai mujhe

vo kam-shanās mirī dāstāñ se niklegā

use nikālā gayā thā bahisht se pahle

ab us ke baad ye aadam jahāñ se niklegā

ab aur zabt karegā to ‘ābdī’ terā

shakeb aañkh ke sail-e-ravāñ se niklegā

Leave a Comment