Sufi

Daman Ki Fikr Hai Na Gareban Ki Fikr Hai

daman ki fikr hai na gareban ki fikr hai

ahl-e-vatan ko fitna-e-dauran ki fikr hai

gulshan ki fikr hai na bayaban ki fikr hai

ahl-e-junun ko fasl-e-baharan ki fikr hai

logon ko apni fikr hai lekin mujhe nadim

bazm-e-hayat-o-nazm-e-gulistan ki fikr hai

ham maqtal-e-hayat men hain sar-ba-kaf magar

ahl-e-havas ko apne dil-o-jan ki fikr hai

sahil se duur rah ke hai manzil ki justuju

maujon ki fikr ham ko na tufan ki fikr hai

ham ko nahin hai fikr kisi baat ki ‘niyaz’

tarikiyon men sham-e-farozan ki fikr hai

More Poems

Leave a Comment