taqdir ke aage kabhi tadbir kisi ki
chalti ho to samjhe koi taqsir kisi ki
ab ek tamanna ho to puuri koi kar de
yuun kaun badal sakta hai taqdir kisi ki
dil men utar aa.i hai nigahon se simaT kar
kis darja haya-kosh hai tasvir kisi ki
vo aa.en na aa.en mujhe niind aa nahin sakti
sunta hi nahin nala-e-shab-gir kisi ki
barsat ka ik ḳhvab hai mustaqbil-e-tarik
bikhri hui si zulf-e-girah-gir kisi ki
allah ye tarik faza.en ye ghaTa.en
ye barq-e-ḳhayalat men tasvir kisi ki
ankhen miri ankhen hain zahe joshish-e-girya
dhul dhul ke nikhar aa.i hai tasvir kisi ki
‘talib’ tire jazbat ki tashrih to kar duun
Dar hai kabhi ho jaa.e na tash.hir kisi ki
Leave a Reply