sabza tumhare rukh ke liye tang ho gaya
tuuti ka aks aaine men zang ho gaya
past-o-buland dahr men khata huun thokaren
aisa samand-e-umr-e-ravan lang ho gaya
bismil ko bhi tadapne ki milti nahin jagah
kya arsa-e-hayat-e-jahan tang ho gaya
ham-zad se bhi ye tan-e-laghar hua subuk
tola to apne saaye ka pasang ho gaya
josh-e-junun ne jism ke purze uda diye
rakht-e-barahnagi bhi mujhe tang ho gaya
us but se jism-e-zar jo lipta shab-e-visal
aalam ko ehtimal-e-rag-e-sang ho gaya
mazmun-e-ah-e-garm ne jalva dikha diya
ud kar hava men naama mira chang ho gaya
naale kiye tasavvur-e-gesu men raat bhar
dil ham-safir-e-murgh-e-shab-ahang ho gaya
sar kat ke gir pada usi qatil ke paanv par
jallad se milap dam-e-jang ho gaya
ud ud ke mere chehre par ai shokh rah gaya
murgh-e-shikasta-bal mira rang ho gaya
karta raha lughat ki tahqiq umr bhar
aamal-nama nuskha-e-farhang ho gaya
munh tak bhi zoaf se nahin aa sakti dil ki baat
darvaza ghar se saikdon farsang ho gaya
mahrum huun main khidmat-e-ustad se ‘munir’
kalkatta mujh ko gor se bhi tang ho gaya
Leave a Reply