tavil hijr hai ik muḳhtasar visal ke ba.ad
men aur ho gaya tanha tire ḳhayal ke ba.ad
tapish ik aur hai din ki hararton ke siva
safar ik aur hai suraj tire zaval ke ba.ad
kisi se rakhte kahan dushmani ka rishta ham
lahu ko sard bhi hona tha ik ubaal ke ba.ad
jo toḌna hai to dil is ada se toḌ mira
koi malal na ho mujh ko is malal ke ba.ad
zara bhi soch na paaya main apne baare men
koi ḳhayal na aaya tire ḳhayal ke ba.ad
kahan ga.i vo mohabbat ki jis ke saa.e men
lipaT ke ro.e the ham donon arz-e-hal ke ba.ad
ye dil ki baat hai sauda-gari nahin yaaro
kisi ne ki hai mohabbat bhi dekh-bhal ke ba.ad
‘shakil’ band hua ham pe is ka darvaza
kabhi saval se pahle kabhi saval ke ba.ad
Leave a Reply