Zubair Rizvi
phir dil ko roz o shab ki vahi iid chahiye
TuuTe ta.alluqat ki tajdid chahiye
ḳhali nahin hai ek bhi bistar makan men
ik ḳhvab dekhne ke liye niind chahiye
ham mangte rahe tire ruḳhsar o lab ki ḳhair
ai sahab-e-jamal tiri diid chahiye
ham ko to ik rifaqat-e-ashufta-sar bahut
in ko hujum-e-rah ki ta.id chahiye
har astin ke ḳhuun ne qatil bata diye
shahr-e-sitam ko zulm ki tardid chahiye
ham par zamin ke raaz to sab munkashif hue
ab asman ke hone ki tamhid chahiye
Leave a Reply