rumana-rumi

Justuju Teri Dard-E-Sar Thahri

justuju teri dard-e-sar thahri

le ke mujh ko ye dar-ba-dar thahri

tujh se mansub jab talak main rahi

meri hasti bhi mo’atabar thahri

ye miri zindagi tumhare baghair

kitni be-rang-o-mukhtasar thahri

mushkilen mujh ko DhunDne niklen

dam jo lene ko lamha bhar thahri

ye saliqa tujhi se aaya hai

baat karne men ba-hunar thahri

uf tiri banhon ka hisar-e-latif

yuun laga shaam men sahar thahri

jis pe mahv-e-safar raha tu mudam

bas vahi meri rahguzar thahri

ek tum ho ki haath men patthar

aur main ek shishagar thahri

apne irfan-e-zat se ‘rumi’

apne andar main mo’atabar thahri

More Poems

Leave a Comment