dam le ai kohkan ab tesha-zani khuub nahin
jan-e-shirin ko na kho koh-kani khuub nahin
tuk tu hans-bol ye ghuncha-dahani khuub nahin
rashk-e-gul itni bhi haan kam-sukhani khuub nahin
sar pe qumri ko bithaya to hai tu ne par sarv
teri azad-vashi be-kafani khuub nahin
qabil-e-chasm-numai hai tu ai tifl-e-sarishk
abtar itna bhi na ho nashudani khuub nahin
fasl-e-gul aane de dikhla na abhi se zanjir
ye ravish mauj-e-nasim-e-chamani khuub nahin
mana hansne se to karta nahin ai barq-vasho
phir shararat se ye chashmak-zadani khuub nahin
ho sake tujh se to kar murgh-e-chaman gul ka ilaaj
us ko bimari-e-aaza-shikani khuub nahin
koi dam aur bhi us abru-e-pur-kham ko chhu
asfahani ye abhi tegh bani khuub nahin
chashm se us ki na kar daav-e-ham-chashmi dekh
ki khata aisi ghazal-khutani khuub nahin
maar khaega vo khayyat ki jis ne tere
band jaame ke liye nag-phani khuub nahin
munh ko dekh apne tu aur us ke lab-e-lal ko dekh
ru-kashi us se aqiq-e-yamani khuub nahin
tark chashm-e-but-e-bad-kesh khayal us ka chhod
murgh-e-dil sahme hai navak-fagani khuub nahin
shakh-e-gul hai ki kamar baad se lachke hai tiri
ai miyan itni bhi nazuk-badani khuub nahin
main bhi huun badiya-paima-e-junun ai majnun
is qadar aage mire laf-zani khuub nahin
chhalni kanton se hue go mire talve lekin
dasht-e-vahshat ki abhi khaak chhani khuub nahin
zahr kha jaunga ai saqi-e-paimana-ba-kaf
baaz aa jaane de paiman-shikani khuub nahin
Leave a Reply