Dhup Mein Nahae the Raushni Ke Pahre The

Pawan Kumar

dhuup men naha.e the raushni ke pahre the

phir bhi un daraḳhton ke saa.e kitne gahre the

dekhta raha mujh ko aa.ina bhi hairat se

aaj mere chehre men jazb kitne chehre the

in dinon to ḳhushiyon ke rang bhi hain afsurda

un dinon udasi ke rang bhi sunahre the

vaqt-e-qatl chiḳha main koi kuchh nahin bola

log meri basti ke gunge aur bahre the

main vo ek shahzada jis ki ik haveli thi

aur us haveli ke chaar samt pahre the

vaqt ne badan apna kar diya hai shal varna

ham bhi teri umron men shaad the chharhare the

ishq vo laḌakpan ka kya hi lutf deta tha

shab-barat thiin raten aur din dashahre the

aap jis ilaqe men ek pal na rah paa.e

ham usi ilaqe men ek umr Thahre the