koi bagula raqsan mere andar hai
dil-sahra men jashn ke jaisa manzar hai
main ne kaise kaise moti DhunDe hain
lekin tere aage sab kuchh patthar hai
balcony par aao meri palkon ki
dekho kitna gahra niila samundar hai
ḳhamoshi se maar na de ik din mujh ko
shor sa ik jo meri zaat ke andar hai
chahe jo bhi khiḌki men kholun ‘at.har’
sab ke bahar ek hi jaisa manzar hai
Leave a Reply