Jigar Barelvi
bigḌen vo ham se ki ham un se sab men ik lazzat hoti hai
jiine men baḌa lutf aata hai jab dil se mohabbat hoti hai
ham kis se puchhen tum hi kaho kuchh kaam ye jiina aaya bhi
ham loTte hain angaron par kuchh tum ko masarrat hoti hai
dozaḳh ko yahi jannat kar de jannat ko yahi dozaḳh kar de
ham tujh ko bata.en kya hamdam kya chiiz mohabbat hoti hai
ham bada-o-jam ke parde men kuchh raz-e-junun kah jaate hain
jab ishq ka nashsha chaḌhta hai maḳhmur tabi.at hoti hai
ham marte hain ya jiite hain tum shaad raho abad raho
kya tum se kahen kya hota hai jab hijr ki saa.at hoti hai
ab is men hamari kya hai ḳhata majbur se hain lachar se hain
dil hai to mohabbat karte hain tum ho to mohabbat hoti hai
parvarda-e-sahil kya jaane asuda-e-manzil kya samjhe
jo duur hain sahil-o-manzil se un ki kya halat hoti hai
jab josh-e-masarrat hota hai ham aap se kho.e jaate hain
hasti men bharam aa jaata hai jab gham ki shiddat hoti hai
main husn ka ek pujari huun hai sha.iri husn ki ik devi
jo fikr-e-suḳhan bhi hoti hai ham-rang-e-ibadat hoti hai
Leave a Reply