Hamdam Kashmiri
maslub aftab sar-e-sham kyuun hua
hona tha hadisa to lab-e-bam kyuun hua
jis par kisi jagah bhi mire dastaḳhat na the
mansub mere naam vo paigham kyuun hua
vo kaun tha jo haath mila kar nikal gaya
barpa hisar-e-jism men kohram kyuun hua
be-raz raste hain manazir udaas hain
qiston men mere shahr ka nilam kyuun hua
rutba mila na kyuun use apnon ke darmiyan
bahar tha ḳhaas agar vo yahan aam kyuun hua
phulon ki vadiyon ki taravat mili unhen
aur qahr-e-reg-zar mire naam kyuun hua
ankhon pe mujh ko apni bharosa nahin raha
itna ḳharab ḳhvab ka anjam kyuun hua
Leave a Reply