Sufi
mujhe un se mohabbat ho gai hai
meri bhi koi qimat ho gai hai
vo jab se multafit mujh se hue hain
ye duniya khubsurat ho gai hai
chadhaya ja raha huun daar par main
bayan mujh se haqiqat ho gai hai
ravan dariya hain insani lahu ke
magar paani ki qillat ho gai hai
mujhe bhi ik sitamgar ke karam se
sitam sahne ki aadat ho gai hai
haqiqat ye hai ham kya uth gae hain
vafa duniya se rukhsat ho gai hai
gham-e-janan men jab se mubtala huun
gham-e-dauran se fursat ho gai hai
ab un ki kufr-samani bhi ‘atish’
dil-o-jan par ibarat ho gai hai
Leave a Reply