Rashid Taraz
vahshat-e-dil chashm-e-hairan ḳhvab-e-sahra aur main
ik bisat-e-shauq par mera tamasha aur main
tere hathon se bana kashkol bharta hi nahin
qarya qarya ghumte hain mera kaasa aur main
ek hi surat ke do TukḌe hue hon kya ḳhabar
shaam ke mathe pe vo pahla sitara aur main
dam-ba-dam saut-o-sada na-mo’tabar hoti ga.i
pusht par hai phir bhi goya mera saaya aur main
us ke hisse men to abadi rahi sahil raha
mere hisse men hai ‘rashid’ chaḌhta dariya aur main
Leave a Reply