Ankit Maurya
haden baḌhne lagi thi tirgi ki
kami jab ho ga.i thi raushni ki
ḳhuda tu hi bata kis baat pe ye
saza ham ko mili hai zindagi ki
koi karta nahin hai intizar ab
zarurat bhi nahin paḌti ghaḌi ki
karen duniya jahan ki fikr kyon ham
hamari umr hai avargi ki
ham ik muddat se ro.e ja rahe hain
chukani paḌ rahi qimat hansi ki
ḳhushi men yaad na aa.i ḳhuda ki
jab aaya gham usi ki bandagi ki
main ab har chiiz se ukta chuka huun
mujhe mat do dua.en zindagi ki
Leave a Reply