ḳhayal-e-hijr men ab jo bhi saneha hoga
vahi to phir se naya ek silsila hoga
kise ḳhabar thi ki is raushni ki chadar men
hamara ishq men phulon se rabta hoga
amir-e-shahr ko paigham mil bhi jaa.e to
gharib-e-shahr ka koi na aasra hoga
na.e ufuq se gurezan na ho mire hamdam
purani soch se ab ye na faisla hoga
ḳhuda ka shukr dua.en jo rang laa.i hain
likhungi lafz main jo bhi vo barmala hoga
sunenge log ye jab bhi miri kahani ko
hisar-e-zat ke qaidi ka majra hoga
ajiib haal hai andar ki ḳhalfashari ka
kise ḳhabar thi ki aisa ye hadisa hoga
Leave a Reply