jo raqibon ne kaha tu vahi bad-zan samjha
dost afsos na samjha mujhe dushman samjha
na-tavan vo huun ki bistar pe mujhe dekh ke aah
tar-e-bistar koi samjha koi sozan samjha
tegh-e-qatil jo mohabbat se lagi aa ke gale
taab ko us ki main apni rag-e-gardan samjha
apne pajama-e-kam-khvab ki har boti ko
shama-ru shab ko charagh-e-tah-e-daman samjha
sur-at-e-ablaq-e-ayyam se ghafil tha aah
dam-e-akhir main use umr ka tausan samjha
khar-e-sahra se chhidi jab kaf-e-pa majnun ki
khak-bezi ko vo ghirbal ka rauzan samjha
kamar-e-yar ka az-bas-ki jo rahta hai khayal
dil ko main chini-e-mu-dar ka bartan samjha
gul ko maalum na thi hasti-e-fani apni
ai nasim-e-sahari vaqt-e-shaguftan samjha
bistar-e-gul se munaqqash jo hua us ka badan
tan-e-nazuk pe vo phul-kari ki chipkan samjha
jite-ji chahiye hai aqibat-e-kar ki fikr
faeda kya agar insan pas-e-murdan samjha
mirzai ko na fariyad ne chhoda ta-marg
jigha-e-sar tujhe ai tesha-e-ahan samjha
aks-afgan hai tire saghar-e-sahba men ye zulf
tu abas ai but-e-mai-kash use nagan samjha
saya-e-zulf ne us ke ye diya dhoka raat
chalne valon ne jise afi-e-rahzan samjha
chashm ne apni taraf se to sujhai thi ‘nasir’
dil na par us sitam-ijad ki chitvan samjha